LKK
Honora Komitato
    
pri Kroatio
pri Zagreb

Utilaj informoj
Vizoj
Kongresejoj
Loĝado en Zagreb

Programo
Ekskursoj 
Aliaj aranĝoj
Dua Bulteno

Ligoj al...

al la enir-paĝo

Antaŭkongresaj ekskursoj

A1 oficiala antaŭkongreso: opatija kaj istrio
14-21 julio
Tiu ĉi ekskurso donos al vi ŝancon sufiĉe detale konatiĝi kun la plej konata turisma regiono en Kroatio: la ĉarma kaj plurfaceta Istrio kaj ĝia perlo, la "malnova damo", eleganta urbo Opatija. Opatija (itale: Abbazia) estas kreita por ĝui la belaĵojn de la naturo, suno, maro, kaj por vivplezuroj. Bonegaj restoracioj, promenejoj kaj ĉiam brila vetero faras Opatija celo numero unu de ĉiuj vizitantoj de norda Adriatiko. Ĝi estis la ŝatata celo ankaŭ de la vienaj korteganoj de la iama habsburga imperio.
Istrio, la regiono ĉirkaŭ Opatija, estas mirinda lando, ĉemare kaj interne. Ĝi estas escepte bela, tra la historio benita kaj malbenita pro sia mult-kultura kaj landlima situo, kio faras ĝin interesa ankaŭ por la esperantistoj. Dum tiu ĉi antaŭkongreso, la bazo estos en Opatija, sed oni vizitos diversajn celojn: insulon Krk (Veglia) kun ĝia malnovega burgo, insuleton Košljun kun ĝia franciskana monakejo de la 15-a jc., urbon Pula (Pola) kun la onidire plej bone konservita romia amfiteatro (areno) en la tuta mondo, Poreč (Parenzo) kun ĝiaj romiaj kaj bizancaj historiaĵoj, kaj Rovinj (Rovigno), belega tipa nord-adriatika mediteranea urbeto, kiu ĉiam allogegis la vizitantojn. Ankaŭ plurajn lokojn en la interno de la duoninsulo oni vizitos. Kaj fine kiel pinto de tiu ĉi fascina vojaĝo: arkipelago Brijuni (Brioni), belega nacia parko, somera rezidenco de aŭstraj, jugoslaviaj kaj kroataj ŝtatestroj. Vi facile komprenos kial ili ŝatis ferii tie.
La prezo inkluzivas loĝadon en tristela hotelo, busveturon Zagrebo-Opatija-Zagrebo, veturbiletojn, enirbiletojn, ekskursojn, matenmanĝojn kaj vespermanĝojn (lunĉoj estos laŭ propra elekto) kaj ĉiĉeronon en Esperanto.
Ekiro je la 09h00 de hotelo Esplanade, reveno al Zagrebo vespere.

A2 antaŭkongresa krozo: velŝipa navigado laŭ la dalmataj urboj kaj insuloj
14-21 julio
Tiu ĉi unika krozo donos al vi eblon konatiĝi kun meza Dalmatio, lando de belegaj urbetoj kaj eĉ pli belaj insuloj en ĝia lazure blua maro. Dalmatio estas neripetebla majstroverko de interago inter kulturo kaj naturo.
Sabato: Split – Rogoznica
La ekskurso komenciĝos frumatene per vojaĝo al Split, unu el la plej malnovaj konservitaj mediteraneaj urboj. La urba kerno estis konstruita de la romia imperiestro Diokleciano, kiu ja devenis el tiu regiono. La Palaco de Diokleciano – la centra urba burgo – ankoraŭ funkcias kiel la koro de la urbo. Tio estas nur unu el la bonaj kialoj viziti Split (cetere: devenurbo de Ivo Lapenna). Posttagmeze oni elnavigos direkte al insulo Ĉiovo por naĝi kaj ripozi en unu el la intimaj golfetoj de la insuleto. Tranokto en Rogoznica, hejmloko de fama kroata vino "Babić".
Dimanĉo: Rogoznica – Kaskadoj de Krka
Post la matenmanĝo kun panoramo de ęibeniko ŝipflanke, oni eniros la delton de la rivero Krka ĝis la pitoreska urbeto Skradin. Per turismaj boatetoj vi alproksimiĝos al la kaskadoj de Krka, kie eblos naĝi en freŝa dolĉakvo. Sekvos la esplorado de la riĉegaj flaŭro kaj faŭno de tiu ĉi belega nacia parko, laŭ sia beleco eventuale komparebla nur kun la Lagoj de Plitvice, sed laŭ la ĉarmo kaj etoso kun neniu alia loko en la mondo. Tranokto en Skradin.
Lundo: Kaskadoj de Krka – Šibeniko
Post la matena naĝado oni renavigos al Šibeniko, kie vi pasigos la tagon en unu el ĝiaj belaj golfetoj. Tranokto en tiu ĉi urbo kun bela mezepoka burgo surmonte kaj ĝia fama katedralo (samtempaĵo de la Siksta Kapelo) en la renesanca kerno.
Mardo: Šibeniko – Kornati
Arkipelago Kornati, jen alia nacia parko, kiu konsistas el 140 insuletoj. Tie vi pasigos la tempon en unu el la sennombraj golfetoj, sed ĉi-foje nure via, tute privata. Vi ankaŭ tranoktos meze de la Kornata insularo riĉa je fiŝoj, kulturaj kaj naturaj trezoroj. Ruinoj de antikva ilira fortikaĵo, fru-kristana preĝejo, kaj mezepokaj fortikaĵoj kaj vilaĝoj estas nur kelkaj el la menciindaĵoj tieaj. Tamen la insuloj kaj la marrokoj mem estas la plej spektakla vidaĵo en tiu ĉi paradiza loko.
Merkredo: Kornati – Zadar
Post plia krozado tra la arkipelago, oni atingos Zadar kaj haltos tie por banado kaj tagmanĝo. La urbon oni atingos en la vesperaj horoj, kiujn oni uzu por esplori la kaŝitajn anguletojn de la antikva urbokerno, fermita en tipajn muregojn kiuj ĉirkaŭzonas tiun ĉi iaman metropolon de Dalmatio, ĉefurbon de la napoleona provinco Ilirio.
aŭdo: Zadar – Vodice
Jen, ŝanĝo de la navigdirekto, kaj krozado laŭlonge de la bordoj de Meza Dalmatio, kun ties tipaj lokoj. Vespera halto en Vodice, unu el la karakterizaj mezdalmataj vilaĝoj kun riĉa turisma vivo somere kaj suko de la ĉiutaga vivo, tipe dalmata.
Vendredo: Vodice – Trogir
Pli kaj pli proksime al la bordaro de Split, sed kun nepra halto en la vizitinda antikva urbo Trogir. Tiu ĉi urbeto, fondita de antikvaj helenoj, ofte estas nomata "Dalmata Venecio", pro belegaj majstropecoj de la urba arkitekturo.
Sabato: Trogir – Split
Elveturo direkte al Split kun plezuriga rigardo al la panoramo de bordoj kaj plaĝoj de la dalmata metropolo. Elŝipiĝo matena kaj traurbado. Reveturo al Zagrebo kaj forvojaĝaj aranĝoj.

Ekiro je la 07h00 de hotelo Esplanade, reveno al Zagrebo vespere.
La prezo inkluzivas busveturon Zagrebo-Split-Zagrebo, ŝipveturon, enirbiletojn, matenmanĝojn kaj lunĉojn (vesper-manĝoj estos laŭ propra elekto en la halt-havenoj), kaj ĉiĉeronon en Esperanto.

 

Postkongresaj ekskursoj

P1 oficiala postkongreso en dubrovnik
28 julio – 4 aŭgusto
Tiu ĉi septaga postkongresa ekskurso kondukos vin en la koron de iama glora komercista respubliko, Dubrovnik. La riĉa pasinteco postlasis siajn signojn en tiu ĉi mirinda urbo: fortegaj bizancaj muroj ĉirkaŭ la tuta urbo ŝirmas belegan renesancan urbon ene. Ne senkiale Unesko klasigis la urbon kiel parton de la monda kultura heredaĵo. Ĝi estas sendube unu el la plej belaj urboj en Mediteraneo. Sed Dubrovnik ne eblas priskribi: oni devas ĝin vidi.
Krom la urbo mem, ankaŭ ĝia ĉirkaŭaĵo meritas viziton. Ston kaj Trsteno, fama arboĝardeno, najbara urbo Cavtat kaj pitoreska valo Konavle apartenas al la riĉa ekskursa programo. ęipe oni vizitos eble la plej belajn insulojn de la kroata marbordo: Korĉula (kie laŭdire vagis ankaŭ Ulikso mem, kaj kie naskiĝis la fama mondvojaĝanto Marko Polo) kaj Mljet, kiu famegas pro sia rava natura ĉarmo kaj la beleco de siaj maro, lagoj kaj arbaroj. Tute prave oni nomas ĝin "perlo adriatika".
Ekiro: 28-07 je la 08h00, de hotelo Esplanade. La prezo inkluzivas transportojn per luksaj busoj kaj per boatoj, 7 hoteltranoktojn kun du manĝoj tage (duonpensiono), enirbiletojn al ĉiuj vizitotaj objektoj, ĉiĉeronon. Reveno posttagmeze aŭ fruvespere.

P2 postkongresa velŝipa krozado: la mirindaj insuloj de dalmatio
28 julio – 4 aŭgusto
Sufiĉos al vi kelkaj T-ĉemizoj, bankostumo kaj bona humoro por plene malstreĉiĝi dum sep neforgeseblaj tagoj krozante laŭ la kroataj insuloj de Suda Dalmatio, kie historio, kulturo kaj naturo konstante klopodas superi unu la alian. Lasu la ŝipanaron (ĉefe la kuiriston!) dorloti vin. Al vi restas nur taskoj baniĝi, sunumi, pigretumi kaj esplori la kristale bluajn profundojn de la adriatika maro, kaj arkitekturajn perlojn de la pasintepokaj majstroj.
Sabato: Split – Makarska
La ekskurso komenciĝos per vojaĝo al Split, unu el la plej malnovaj konservitaj mediteraneaj urboj. La urba kerno estis konstruita de romia imperiestro Diokleciano, kiu ja devenis el tiu regiono. La Palaco de Diokleciano – la centra urba burgo – ankoraŭ funkcias kiel la koro de la urbo. Tio estas nur unu el la bonaj kialoj viziti Split (cetere: devenurbo de Ivo Lapenna). Post la posttagmeza banumo, elnavigo direkte al Makarska, fama turisma loko kaj agrabla meditearanea urbeto tipa por Suda Dalmatio, kiu ĉiam indas je vizito.
Dimanĉo: Makarska – Mljet
Kiam matene vi ankoraŭ dormeme aperos sur la ferdeko, Makarska jam estos malantaŭ la boata poŭpo. La posttagmezan banadon vi faros sur la insulo Mljet, ne senkiale titolita "la perlo adriatika". Tie situas nacia parko Mljet, kiu igis multajn konsideri ĉi tiun lokon la plej mirinda el la tuta milo de kroataj insuloj. Sur la insulo troviĝas lageto kun alia insuleto meze de ĝi kaj antikva monakejo kaj preĝejeto. Nekredebla harmonio kaj kalmo de la naturo kaptos vin tuj.
Lundo: Mljet – Korĉula
Post la matena naĝado vi eknavigos al Korĉula, la naskiĝloko de Marko Polo, eble la plej konata dalmato kaj interkultura aganto de ĉiuj epokoj. La insulo mem indas je la vizito eĉ sen tio, sed des pli se vi ŝatas legendojn. Unu el ili diras ke la urbon Korĉula fondis helena heroo Anthenor en la 12-a jarcento a.K.
Mardo: Korĉula – Ŝĉedro
Post matena promeno tra la korĉulana bazaro, plunavigo al la pitoreska insuleto Ŝĉedro, kie vi plene ĝuos la maron kaj la sunon en iu el ĝiaj intimaj plaĝriĉaj golfetoj, ĝis la nokto, kiun vi pasigos en tiu ĉi marparadizeto.
Merkredo: Ŝĉedro – Hvar
Frue matene vi elnavigos direkte al la Inferaj Insuloj, arkipelago kiu ŝuldas sian nomon al kruelaj lokaj kondiĉoj de fortaj marfluoj kaj senakveco, sed cetere belega arkipelago, kie vi haltos por tagmanĝo kaj banado. Vi tranoktos en la urbo Hvar, kiu fieras pri sia renesanca teatro el 1612, unu el la plej malnovaj popolaj teatroj en Eŭropo. Hvar, krom sia riĉa historio, ofertas ankaŭ belan noktan vivon kun sia vario de restoracioj kaj amuzejoj.
Ĵaŭdo: Hvar – Bol
Insulo Braĉ, fama pro siaj fajnsablaj plaĝoj, estas la dua plej granda kroata insulo. Post matena bano en unu el la plej belaj insulaj plaĝoj, vi daŭrigos al Bol, la turisma pintloko de meza Dalmatio, kiu tamen konservis la ĉarmon de iama tipa fiŝista loko. Vi povos admiri la "duflankan" plaĝon Zlatni Rat, kiu plene meritas sian nomon de "Ora Kabo".
Vendredo: Bol – Supetar
Aliflanke de la insulo kuŝas Supetar, alia turisma ĉefcelo de la insulo, kie vi naĝos ĉe unu el la abundaj lokaj plaĝoj. Vi ankaŭ havos la okazon esplori la vivon en tipe dalmata vilaĝo, kia estas Supetar. Tie nepre aĉetu peceton da suno kiu transverŝiĝis en olivoleon, vinon aŭ tipan herbobrandon, kiajn oni povas trovi nur en tiu ĉi loko.
Sabato: Supetar – Split
Elveturo direkte al Split, kun plezuriga rigardo al la panoramo de bordoj ĉirkaŭsplitaj. Elŝipiĝo matena kaj urboesplorado de tiu ĉi ĉiam interesa ĉefurbo de belega Dalmatio. Reveturo al Zagrebo kaj forvojaĝaj aranĝoj.
Ekiro je la 07h00 de hotelo Esplanade, reveno al Zagrebo vespere.
La prezo inkluzivas busveturon Zagrebo-Split-Zagrebo, ŝipveturon, enirbiletojn, matenmanĝojn kaj lunĉojn (vesper-manĝoj estos laŭ propra elekto en la halt-havenoj), kaj ĉiĉeronon en Esperanto.

Dumkongresaj ekskursoj

Tuttagaj ekskursoj
merkredo, 25-a de julio (kaj kiam alie indikite)
E1 la lagoj de plitvice
Ekiro: 08h00 Reveno: 20h00
La Lagoj de Plitvice estas turisma loko numero unu en Kroatio: ĉiu kiu vizitas tiun ĉi parton de la mondo simple ne rajtas maltrafi tiun ĉi miraklon de la naturo. La plej bela nacia parko en Kroatio konsistas el 16 lagoj, kiuj ĉeniĝas unu al la alia, formante unikan akvospektaklon kun belegaj kas-kadoj, rojoj, riveretoj kaj to-rentetoj. Ekde 1979 tiu ĉi natura feno-meno estas protektata de Unesko kiel monda naturheredaĵo. La ekskursantoj vidos la tutan nacian parkon kaj veturante al ĝi haltos en Rastoke, kie troviĝas muelejoj konstruitaj ĉe unu el la akvofaloj. Krom merkrede la ekskurso okazos ankaŭ lunde kaj ĵaŭde.
E2 dubrovnik per aviadilo
Ekiro: frumatene (depende de la flughoraro de Croatia Airlines aperonta en februaro) Reveno: ĉ. 20h00
Unutaga flugekskurso kun urborigardado, tagmanĝo kaj libera tempo por banado. Dubrovnik, dum jarcentoj sendependa respubliko, estas unika adriatika turisma punkto kaj ravas per siaj marsituo, arkitekturo kaj kulturo. Kun sia tre longa historio, ĝi ofertas unikajn vidindaĵojn: imponaj kaj brile konservitaj urbaj muregoj, belega ĉefstrato Stradun, kastelo Lovrijenac (kiu, laŭ multaj fakuloj, estas la plej bona loko por ludi Hamleton!), kaj la rava Palaco de la Duko. Granda parto de la kulturaj trezoroj estas sub la protekto de Unesko. Eblos ankaŭ naĝi en la pura, unike blua Adriatika Maro kaj samtage reveni aviadile al la kongresurbo.
E3 opatija
Ekiro: 08h30 Reveno: 20h30
‚u vi interesiĝas pri kiel feriis aŭstraj imperiestroj, kie naĝis la fama kaj tragika imperiestrino Sissi? Tiukaze, Opatija estas la loko por vi. La plej pinta turismejo en Kroatio, kies unuaj gastoj estis aristokratoj de la Habsburga monarkio el Vieno. Belaj altaj hoteloj kaj vilaoj, kaj longa piedvojo apud la blua maro atendas vin en Opatija. Naĝemulojn atendas blua, varma kaj pura maro. Survoje oni pasas la plej belan montaran regionon (Gorski Kotar) de Kroatio, la urbon Rijeka, kaj parton de ravaj istriaj pejzaĝoj. Oni haltos ankaŭ sur monteto Trsat por ĝui spektaklan panoramon de la Kvarnera Golfo, Rijeka, insulo Cres, monto Uĉka kaj Opatija. La ekskurso okazos ankaŭ marde.
E4 zagorje
Ekiro: 09h00 Reveno: 19h00
‚i tiu ekskurso gvi-das vin al la plej romantika parto de Kroatio. La re-gi-ono abundas je kas-teloj el diversaj periodoj de la historio, postrestaĵoj de riĉa feŭdepoka historio. Unua hal-to estos en Kumrovec, la naskiĝloko de la iama jugoslavia ŝtatestro Josip Broz Tito, kiu distingiĝis pri sia kono de Esperanto. Tie ankaŭ troviĝas tre bone konservita etnovilaĝo, kiu montras kiel oni vivis ĉe la ŝanĝo de la jarcentoj 19-a kaj 20-a. Sekvas vizito al mezepoka kastelo Trakoščan, eble la plej bela kaj plej bone konservita el ĉiuj kroataj kasteloj, kiun apudas raveta ombreca lago kaj parko, en kiu vi piknike lunĉos. Fine ni vizitos Varaždin, la ĉefan barokan urbon de Kroatio. La ekskurso okazos ankaŭ ĵaŭde.
E5 arto kaj arbaro: hlebine–djurdjevac–vrbovec
Ekiro: 09h00 Reveno: 20h00
Kroatio famas laŭ sia naiva pentroarto, sed malmultaj scias ke la plimulto de la pentristoj venas el la pitoreska vilaĝo Hlebine, kie situas unika galerio de naiva pentroarto. Ege famas la pentraĵoj sur vitro. La folklora asocio "Kroata Koro" ne nur montros al vi siajn buntkolorajn kostumojn, sed ankaŭ regalos vin per tradiciaj kukoj kaj trinkaĵoj. Sekvos vizito al la Georgo-urbo Djurdjevac, kie vi vidos ĝian kastelon (kie laŭ la legendo, la loĝantoj venkis turkojn helpe de unu koko), gustumos lokajn manĝojn kaj renkontiĝos kun lokaj esperantistoj. Arbaroj apud Vrbovec proponos al vi ripozon kaj rakonton pri unika kverko nomata lujhnjak. En la arbaro atendas vin unika lunĉo preparita ĉirkaŭ bivakfajro, post kio sekvos tipa popola festo kun muziko. Tiun ĉi ekskurson aŭspicias kompanio "Kroataj Arbaroj", kiu promesas bonegan etoson kaj plezuron.
E6 lonjsko polje (la vadejoj de rivero lonja)
Ekiro: 08h45 Reveno: 21h00
Ĉi tiun ekskurson oni rekomendas al ŝatantoj de pura kaj netuŝita naturo. Lonjsko Polje estas naturparko kun unika plant- kaj birdrezervejo. Tie oni povas vidi la plej multajn cikoniojn en Kroatio. Ni vizitos la cikonian ĉefsetlejon Ĉigoĉ, proklamitan "Eŭropa cikonivilaĝo" de agentejo Euronatur. Vizito al ornitologia rezervejo Krapje Dol, kie oni povas vidi iujn tipe lokajn birdojn (ekz. kuler-birdon, kun beko kulerforma). Proksime troviĝas ankaŭ la unikaj etno-vilaĝoj Mužilovica kaj Krapje, kun tute aparta arkitekturo kaj interesega muzeo pri linproduktado, de semoj ĝis tolaĵoj. La ekskurso komenciĝos per vizito al Sisak, la regiona ĉefurbo kun 2500-jara historio. Vizito al malnova burgo kaj kastelo, famaj pro bataloj kontraŭ turkoj. Se estos alta akvo oni boatos al Ĉigoĉ, alikaze oni busos. La lunĉo estos kamparanstila, de tiu regiono. Fine veturo al Jasenovac, memorloko de terura koncentrejo el la Dua Mondmilito. Unika ekskurso, sed ne reko-mendebla al tiuj kiuj kutimas turisman komforton: cikonioj kaj raraj birdoj ne ŝatas teknikan civilizon, do mankas la kutima turisma infrastrukturo, kaj la ekskurso ne taŭgas por handikapitoj aŭ homoj kun marŝproblemoj. La ekskurso okazos ankaŭ lunde.

Duontagaj ekskursoj
D1 zagrebo: urboesplorado
Dum kvar horoj oni unue buse esploros la Suban Urbon, ĉefe ties "verdan hufon", kun belegaj parkoj kaj riĉa botanika ĝardeno. Vizito al Mirogoj, parko kaj tombejo, fama pro aparte artisma hortikultura aranĝo. Poste sekvos piedpromeno tra la Supera Urbo kaj Kaptol (la eklezia urbo). La domoj en la Supera Urbo, nomata Gradec, devenas el la 18-a aŭ 19-a jarcento. Pluraj domoj havas sian rakonton el la politika, arta aŭ kultura vivo de la urbo. Ĉi tie troviĝas la kroata parlamento, la urba parlamento, ministerioj, belaj preĝejoj, tri turoj kiel restaĵoj de la mezepoka murego, kvin muzeoj, kaj pitoreskaj stratetoj.
Dimanĉe, lunde, marde, ĵaŭde. Proksimuma daŭro: 4 horoj.
Ekiro: 09h30.
D2 urba muzeo de zagrebo
‚io valora el la riĉa Zagreba historio troviĝas en la Muzeo de la Urbo: temoj el kultura, arta, ekonomia kaj politika zagreba historio; situo inter kelkaj monumentoj de alta kategorio, interalie la iama monakinejo de Klarinoj. Apudas ĝin la Turo de la Pastro (kie iam estis la redaktejo de Homo kaj kosmo, fama revuo en Esperanto), la Grenejoj de Zakmardi kaj la malnova bazlernejo. La muzeo mem estas unu el la plej originale kaj lerte organizitaj muzeoj en tiu ĉi parto de la mondo, kaj indas je vizito se nur pro tio.
Mardo, vendredo. Proksimuma daŭro: 3 horoj. Ekiro: 09h30.
D3 skulptisto ivan meštrović en zagrebo
La kroata Michelangelo, la plej granda kroata skulptisto Ivan Meštrovi', lasis en Zagrebo imponan kolekton de siaj verkoj. Ni vidos tri verkojn liaj kiuj troviĝas sur du placoj, kaj vizitos muzeon Meštrović kun 300 verkoj de la fama artisto. Ni vizitos ankaŭ la placon de viktimoj de faŝismo, kie situas la Domo de Kroataj Artistoj, konstruita de Meštrović.
Lunde, ĵaŭde. Proksimuma daŭro: 2 horoj. Ekiro: 09h30.
D4 samobor
Samobor estas urbeto apenaŭ dudek kilometrojn de Zagrebo, kaj fama kiel ekskursejo de la zagrebanoj. Tie ĉi regas aparta etoso, aliaj vivritmo kaj filozofio, en kiuj grave rolas malstreĉiteco kaj ĝuado de vivplezuroj. Samobor famas pro sia pitoreska arkitekturo, bonegaj vinkeloj kaj restoracioj. Eĉ hodiaŭ zagrebanoj ne hezitas iri tien simple por aĉeti kukojn. Iuj el la receptoj estas famaj sed ankaŭ sekretaj: nur iuj familioj en Samobor konas ilin. Ĉarmaj promenejoj en la pitoreska urbeto vekos en vi deziron reveni ĉi tien. Ja ĉiuj revenas, kaj la zagrebanoj ne povas liberiĝi de tiu kutimo.
Dimanĉe, lunde, marde, ĵaŭde.
Proksimuma daŭro: 4 horoj.
Ekiro: 09h30.
D5 krapina kaj ĝia prahomo
Krapina estas tipa urbo de la montara regiono Zagorje (Transmontaro), kiu donis al la kroata historio multajn famulojn, sed pleje famas pro la elfosaĵoj de neandertala triba setlejo, vivloko de la Krapina Prahomo (Homo krapiniensis), la plej karakteriza tiutipa trovejo en tiu ĉi parto de Eŭropo. La regiono meritas viziton ankaŭ pro la belega verda pejzaĝo kiu sterniĝas ĉie ĝis kie atingas la vido.
Marde, vendrede. Proksimuma daŭro: 4 horoj.
Ekiro: 09h30.
D6 sljeme: la monta dorso de zagrebo
La monto Medvednica (nomata de zagrebanoj kutime Sljeme: tegmento, pinto), altas 1035 metrojn kaj estas verda trezorejo de Zagrebo. Ĝiaj riĉaj arbaroj proponas al zagrebanoj sian freŝan ombron dum varmaj someraj tagoj, kaj neĝan idilion kaj skiterenojn dum vintro. Ĉiam ĝi regalas per belegaj panoramaj vidaĵoj de la tuta urbo kaj ĉirkaŭaĵo. Estos vizito al la nun renovigita mezepoka burgo Medvedgrad, sur kiu troviĝas multaj tavernoj kaj kluboj por montgrimpantoj kaj pluraj bonaj popolaj restoracioj, kaj kie abundas fontoj, rojoj kaj riveretoj. Bonega ideo, por fuĝi el varma kaj verva urbego kaj kongreso dum kelkaj horoj. Kongresanoj kun seriozaj marŝ-problemoj bv. konscii ke estas iom da malfacilaj terenoj en tiu ĉi ekskurso.
Dimanĉe, lunde, ĵaŭde, vendredo. Proksimuma daŭro: 4 horoj.
Ekiro: 09h30.